Тадеуш Доленга-Мостовичийн 'Никодем Дызмагийн карьер' зохиолоос сэдэвлэн бүтээсэн 'Нянгар хаданд гарсан нь' Монголын уран сайхны киног та бүхэнд зориулан хүргэж байна. Баабар, Цэнддоо нарын зохиолоор бүтсэн уг кинонд аймгийн зурагт ч гардаггүй, сонин ч очдоггүй нэгэн сумаас түр шилжин ирсэн Нянгарын тухай өгүүлдэг. Дээдсийн хүрээлэн рүү нэвтэрч чадвал амжилт олох боломжтой гэж өөртөө итгэдэг ч хоёр удаагийн сонгуульд ухуулагчаар ажилласан боловч нэр дэвшигч нь сонгогдмогцоо түүнийг тоохоо больдог. Ингээд хоёр талд ажиллаж, нэг талын мэдээллийг нөгөөд худалдах, эсвэл өөрийн нэр дэвшигчийн материалыг зориуд устгаж нөгөө талаас шан авах зэргээр жаахан мөнгө олоод хотод ирдэг. Хими цэвэрлэгээнд угаагч, манаач, цэвэрлэгчийн орон тоон дээр маш бага цалинтайгаар ажиллахдаа жижиг залилан хийх гэж байгаад даргадаа баригдан үүнээсээ болж дарамтлуулан ажлаасаа халагдана. Энэ киноны гол санаа нь 'нохой' яаж хүн болж байгаа, гэхдээ ямар өөдгүй хүн болж байгаа тухай үзүүлдэг. Муу арьсаа тайлж хаяхгүйгээр гоё хүний дүрд хэрхэн орж байгааг маш сонирхолтойгоор харуулж чадсан бүтээл юм.