Шинэ жилийн орой ажлынхантайгаа архи ууж, дараа нь согтуугаар машин барьж явсан Ганзориг, өвөө эмээгийнхээрээ орж бэлэг аваад харьж явсан аав охин хоёрыг дайрч алаад хэргийн газраас зугтсанаар хүйтэн өвлийн энэхүү тууж эхэлнэ. Нөхөр, охин хоёр нь үгүй болсон Ерөө уй гашуудаа автаж Ганзоригийг сэжиглэж, мөрдөн мөшгөх боловч нотлох баримтгүйн улмаас хийж чадах зүйлгүй дэмий л бухимдаж, өс хонзон санана. Ганцаардаж өдөржин цонхны хажууд хоосон хүүхдийн тоглоомын талбай ширтэж гиюүрэн суух Ерөө санаандгүй байдлаар түүний эсрэг талын байрны хөрш залуу Энэрэл цуврал алуурчин болохыг олж мэднэ. Өс хонзон санасан Ерөөд олж, мэдсэн энэ зүйлээ ашиглан Энэрэлээр Ганзоригийг үгүй хийлгэх мэргэн санаа төрж, алуурчин хөршийнхөө хаалгыг тогшсоноор үйл явдал өрнөдөг.